Azərbaycan Respublikasının Prezidenti İlham Əliyev və birinci xanım Mehriban Əliyeva martın 27-də Ağdam rayonunun Sarıcalı kəndinin birinci mərhələsinin açılışında iştirak ediblər.

Kənd Birinci Qarabağ müharibəsində Ermənistan silahlı qüvvələri tərəfindən 1993-cü il iyulun 23-də işğal olunmuşdu. İşğal dövründə kənd viran qoyularaq xarabalığa çevrilmişdi, burada evlərlə yanaşı, məktəb, uşaq bağçası, səhiyyə, ticarət, iaşə obyektləri də vəhşicəsinə məhv edilmişdi. Vətən müharibəsində Ordumuzun şanlı Qələbəsindən sonra üçtərəfli Bəyanata əsasən, Ağdam rayonu noyabrın 20-də Azərbaycana qaytarılıb.

Ağdam şəhərinin mərkəzindən 6 kilometr məsafədə yerləşən bu kəndin təməlini 2022-ci il oktyabrın 4-də Prezident İlham Əliyev qoyub.

Sarıcalı kəndi 1873 nəfər (425 ailə) əhali üçün planlaşdırılıb. Layihələndirilən ümumi ərazi 123 hektardan çoxdur. Ümumilikdə kənddə 2 mərhələ üzrə 425 fərdi evin inşası nəzərdə tutulub.

Sarcalı kəndində qeyri-yaşayış binaları – müasir tələblərə cavab verən inzibati mərkəz, məktəb və uşaq bağçası “AZMAN HOLDİNQ” tərəfindən nəzərdə tutulan müddətdə inşa edilərək təhvil verilib. Dövlətimizin başçısı və birinci xanım həmin obyektlərdə də olublar.

“AZMAN HOLDİNQ” işğaldan azad edilmiş torpaqlarda vüsətlə həyata keçirilən bərpa-quruculuq işlərində, dövlətimizin başçısının tapşırıqlarının yerinə yetirilməsində iştirakdan qürur duyur, bundan sonra da belə layihələrin icrasına öz töhfəsini verməyə hazırdır.